Banda Deseñada galega en Barcelona

Redacción

Galicia contará cunha destacada presenza institucional na XXVII edición do Salón Internacional do Cómic de Barcelona que se vai celebrar do 29 de maio ao 1 de xuño. A Consellería de Cultura e Turismo instalará un stand de 150 metros cadrados que servirá de plataforma de presentación aos creadores galegos. O espazo estará ilustrado polo traballo Galicia. Tempo de BD do deseñador pontevedrés Fernando Iglesias Mouta Kohell (Vilagarcía de Arousa, 1967).

Por primeira vez, Galicia é comunidade convidada ao Salón do Cómic de Barcelona, distinción que con anterioridade só recibiron Madrid, Valencia e as Illas Baleares. Para a Consellería de Cultura e Turismo a invitación do máis importante certame dedicado ao mundo da viñeta a nivel estatal convértese nunha oportunidade única para dar a coñecer o traballo dos ilustradores galegos e para promover e difundir os valores de creatividade que representan.


Froito deste compromiso coa banda deseñada na nosa comunidade, o conselleiro de Cultura e Turismo, Roberto Varela, xa ten confirmada a súa asistencia á inauguración do evento o vindeiro venres 29 de maio. Xunto ao titular de Cultura e Turismo, intervirán na inauguración a cónsul xeral de Bélxica en Barcelona, Karina Tuytschaever; o Director General del Libro do Ministerio de Cultura, Rogelio Blanco; o conseller de Cultura de la Generalitat de Catalunya, Joan Manuel Tresserras e o alcalde de Barcelona, Jordi Hereu. A representación institucional da Xunta de Galicia completarase o sábado 30 coa presenza do director xeral de Difusión e Promoción da Cultura, Francisco López Rodríguez.

O calendario de actividades da delegación galega é o resultado do traballo en equipo dos responsables de Difusión e Promoción da Cultura cos representantes do mundo da banda deseñada na nosa comunidade. Deste xeito, o venres 29 ás 16:00 horas o presidente da Agrupación de Libreiros de A Coruña, Sanmi, moderará a mesa redonda "Galicia, comunidade convidada" na que participarán Gochi, autor e editor; Javi Montes, autor e directivo de AgPI e o autor Jose Tomas. O mesmo venres, ás 17:00 horas terá lugar a inauguración oficial do Salón. O sábado 30, ás 18:30 horas, o stand da Comunidade Galega acollerá a presentación dos últimos proxectos e novidades da banda deseñada en Galicia. Dentro do programa de actividades, o sábado 30 e o domingo 31 están previstas dúas sesións de sinatura de exemplares polos autores galegos que asistirán o certame.

O stand institucional acollerá dúas exposicións sobre o cómic galego. Viñetas descubertas. Certames galegos 2000-2008 é unha panorámica da obra realizada polos autores gañadores dos galardóns máis importantes destes últimos anos en Galicia. Entres os nove autores representados nesta mostra inclúese o traballo de David Rubín, encargado este ano do deseño do cartel oficial do Salón do Cómic de Barcelona.

A exposición Miña Terra Galega resume a visión dos nosos creadores sobre os tópicos relacionados con Galicia. Oito autores presentan, a través de historias de cinco páxinas creadas ex profeso para o certame, as súas versións sobre temas como a chuvia, a paisaxe ou o marisco até a música ou fantasías populares.

A delegación galega terá como artista convidado ao debuxante Xaquín Marín, fundador do Museo do Humor de Fene e precursor do humor gráfico en Galicia. A invitación responde á homenaxe que os novos creadores queren facerlle a Xaquín Marín o seu 30 aniversario como ilustrador.