Ata o vindeiro 11 de setembro a sede da Fundación Caixa Galicia da Coruña engalánase para convidar ao público a un percorrido polos mellores traballos dun dos grandes nomes da fotografía do século XX, Lee Miller, na primeira exposición retrospectiva que se lle dedica en España.
Ao longo dos seus setenta anos de vida, Miller destacou como fotógrafa en campos tan dispares como a moda ou como correspondente de guerra. Seus son algúns dos retratos máis importantes de grandes artistas do seu século como Picasso, Ernst, Man Ray, Margaret Bourke-White e Tàpies, entre outros, ou algunhas das imaxes máis impactantes da II Guerra Mundial.
Lee Miller impregnou o seu traballo da influencia surrealista que lle veu dada pola relación que mantivo con Man Ray e o círculo de artistas no que se movía: Duchamps, Picasso, Magritte, Cocteau e o que sería o seu home, Roland Penrose. Das reportaxes de moda, pasou a correspondente de guerra para a revista Vogue, converténdose así, xunto con Margaret Bourke-White, en pioneira do que hoxe coñecemos como fotoxornalismo.
A Fundación Caixa Galicia abre as súas portas para facer unha viaxe, a través de 96 fotografías, que afondan nalgúns dos acontecementos máis destacados do segundo terzo do século XX, da man dunha das máis grandes da fotografía. Valo perder?
0 comentários :
Danos a túa opinión