Folga filosófica

Bruno Marcos

Habería que ir á folga non por principios económicos, como nos din os sindicatos, senón por motivos dialécticos, é dicir filosóficos, máis concretamente hegelianos. En realidade todos os movementos de esquerda non deixaron de ser hegelianos nunca.

A noticia de que o capitalismo é o mellor dos mundos posibles dánola ultimamente mesmo ese gran demócrata cubano que recomendaba aos seus cidadáns comer flores para paliar a fame correlixionaria xa que admitiu que o seu modelo fracasou.

A desaparición da URSS deixou sen munición real a todas as revolucións pendentes e os obreiros do mundo saben que onde mellor vivirán é no primeiro mundo, en países onde non gobernen os seus.

Explicaba Jakob Böehme que o ben e o mal eran como dous cachorros que xogan a pelexar sempre equilibrando as forzas para non facer sucumbir ao contrario e o que habería que pensar hoxe é cales son exactamente as forzas que andan en liza e se é lexítimo falar de que un partido no goberno debe defender os intereses dunha clase social por moi santa que esta sexa ou se deberiamos falar do que é bo para o país. Nese sentido retomar un concepto tan desmontado como o de patriotismo seríanos moi útil aínda que habería que refundilo.