RedacciónOnte á mañá tivo lugar o acto de presentación da nova web dedicada á catalogación de todas as escolas fundadas por emigrantes galegos. Un ambicioso proxecto que ofrece unha ferramenta moi útil para localizar o legado dos que tiveron que marchar de Galicia para buscar fortuna. O labor xa fora iniciado polo Arquivo da Emigración Galega fai dous anos, cando se publicaran os primeiros resultados. Pero agora, tras meses de arduo traballo, sae á luz esta páxina máis completa, onde o usuario non só atopará no mapa cada unha das escolas: tamén poderá acceder a material extra coma fotografías, os planos orixinais e incluso a reconstrucción da antiga planta de cada edificio.
Deste xeito, os visitantes sumerxiranse nas antigas escolas, ás que poderán explorar dun xeito minucioso. Polo momento, a páxina amosa as 113 escolas que xa están catalogadas nas provincias de Lugo e Ourense. Nunha segunda fase, que se desenvolverá ao longo do 2010 e o 2011, completaranse as escolas que faltan nas provincias da Coruña e Pontevedra. Pero non se trata dun proxecto ríxido que remate coa exposición das escolas xa localizadas: durante o traballo fóronse atopando máis escolas, aínda inéditas, que se irán publicando a medida que se recollan todos os datos precisos. Así, a páxina está concibida como un traballo dinámico, que se actualizará co paso do tempo.
“As Escolas da Emigración” desenvólvese grazas a un convenio do Consello da Cultura Galega coa Secretaría Xeral de Emigración da Xunta de Galicia. Calcúlase que na nosa comunidade existen un total de 220 escolas fundadas entre finais do século XIX e principios do XX. Foron tanto promotores individuais coma sociedades instructivas os que enviaron cartos dende os seus destinos na diáspora, convencidos de que a educación das novas xeracións era a mellor forma de facer progresar Galicia. O proxecto completarase cunha exposición titulada “As luces do alén”.
Visite a nova web
0 comentários :
Danos a túa opinión