Dixitalización dos fondos de TVE-G

Redacción.-

O Consello da Cultura Galega colaborará coa Xunta e coa Cidade da Cultura na dixitalización dos fondos de TVE-G en formato cine (1971-1986). Trátase de recuperar e dixitalizar a memoria audiovisual dos anos finais do Franquismo e dos albores da autonomía en Galicia, noticias e programas producidos aquí entre 1971 e 1976. Ou sexa, os fondos en formato cine, 16 milímetros, do Centro Territorial de TVE, que pasarán logo á Cidade da Cultura. Con ese obxectivo asinaron hoxe un protocolo xeral de colaboración os representantes da Xunta de Galicia, Fundación Cidade da Cultura de Galicia, Radiotelevisión Española e Consello da Cultura Galega. O acto, presidido por Alberto Núñez Feijóo, Presidente da Xunta, tivo lugar no plató do Centro Territorial de TVE en San Marcos-Santiago de Compostela. Os asinantes subliñaron a importancia de dispoñer da memoria audiovisual de quince anos cruciais gardada en 4.564 latas.

Segundo o disposto no protocolo asinado, o Consello da Cultura Galega realizará, nas dependencias do Centro Territorial de TVE, as tarefas necesarias para adecuar e preparar os fondos documentais como paso previo para a súa dixitalización. A Xunta de Galicia, a través da Consellería de Cultura e Turismo e da Secretaría Xeral de Medios, acometerán os traballos de dixitalización.

Radio Televisión Española (RTVE), titular a todos os efectos dos dereitos dos fondos catalogados, recuperados e dixitalizados, facilitará aos asinantes copias de cada contido transformado-dixitalizado para consulta e visionado para fines exclusivos de exposición pública cultural, consulta e investigaciòn docente e académica. Completado o traballo RTVE cederá en comodato á Xunta de Galicia o arquivo de Cine, que pasará a ubicarse na Cidade da Cultura de Galicia.

O director de TVE, Santiago González, destacou o carácter pioneiro do acordo e fixo votos para que puidera ter continuidade noutras comunidades autónomas, noutros centros territoriais. Agradeceu os pasos dados para poder optimizar e compartir os recursos públicos.

Ramón Villares, presidente do Consello da Cultura Galega, lembrou que esta institución xa tiña traballado na clasificación e catalogación destes fondos e aludiu á sinatura do acordo como “acto longamente esperado por nós”. Alfonso Cabaleiro, secretario xeral de Medios, e antigo director do Centro Territorial de TVE, salientou o valor dos fondos audiovisuais e Roberto Varela, presidente da Fundación Cidade da Cultura, resaltou a importancia de que a Cidade da Cultura poida acoller este patrimonio.

O Presidente da Xunta de Galicia, Alberto Núñez Feijóo, cualificou como histórica unha xornada que permite recuperar anos claves da memoria, tamén audiovisual, de Galicia e agradeceu a boa disposición das institutucións colaboradoras.

O protocolo foi asinado por Santiago González, director de TVE, Roberto Varela, presidente do Patronato da Fundación Cidade da Cultura de Galicia, Ramón Villares, presidente do Consello da Cultura Galega, e Alfonso Cabaleiro, secretario xeral de Medios da Xunta de Galicia.

O acto enmarcouse na conmemoración dos corenta anos do Centro Territorial de Radiotelevisión Española en Galicia (1971-2011) -dirixido actualmente polo xornalistra Xavier Fortes- que continuou a última hora da tarde na Cidade da Cultura coa proxección dun documental evocador dos anos en que Galicia dispuxo por vez primeira de imaxes de seu.