Redacción.-
Representantes da Comisión de Asociacións contra as Minas na Terra Chá acudirán mañá, 26 de agosto, até o rexistro do Concello de Cospeito para facer entrega das alegacións veciñais contra as explotacións de cuarzo “Alicia 5917” e “Karles 5519” que a empresa Erimsa quere facer no termo municipal cospeitense.
A pesares dos atrancos impostos polo Concello de Cospeito, que se negou a ampliar o prazo de 20 días para alegar de cara a que as persoas e explotacións agrogandeiras afectadas tivesen tempo abondo para preparar a defensa dos seus intereses, presentaranse centos de alegacións. Así o fai pensar o feito de que, só no primeiro día de asembleas informativas (onte, 24 de agosto) nas parroquias de Goá, Arneiro e Xermar se xuntasen máis de 200 alegacións. Estas xuntanzas veciñais continuarán hoxe, 25 de agosto, na escola de Xustás (Cospeito), ás 11:00 horas; en na Cooperativa O Seixo (A Pastoriza), ás 16:00 horas.
De cara a facilitar o labor dos medios de comunicación, faranse declaracións e atenderase a todos e todas os/as xornalistas que acudan a cubrir a entrega de alegacións, que será mañá, 26 de agosto, ás 11:00 horas, no rexistro do Concello de Cospeito (Avenida da Terra Chá 29).
0 comentários :
Danos a túa opinión