Redacción.-
Un grupo de xóvenes galegos vén de unir as súas forzas para poñer en marcha Vencello, a primeira rede temática de blogues en lingua galega, que xorde a partir da unión de diversos espazos xa existentes na rede e de outros novos creados ex profeso, que tentan cubrir un amplo abano de temáticas co punto en común de estaren escritos en lingua galega.
O nome da rede, Vencello, provén dunha revisión do termo tradicional ‘vencello’ (cordel co que se amarraban os feixes de palla) para adaptalo aos novos tempos: vínculo dun feixe de blogues.
Unha temática diversa
Os blogues que forman parte da rede abranguen todo tipo de temáticas, englobando desde espazos adicados aos sistemas operativos dos gadgets máis punteiros (Android, Apple, BlackBerry) a outros de difusión científica, tecnoloxía, cinema ou videoxogos.
A vontade do proxecto é seguir medrando engadindo cada día novas temáticas e, de feito, ao longo das próximas semanas irán vendo a luz distintos blogues, que agora mesmo se atopan en fase de preparación, tratando os temas máis variados.
A Incubadora
Mais se cadra, un dos aspectos máis novidosos de Vencello é A Incubadora, unha sorte de viveiro de blogues que pretende servir de punto de encontro para xente que desexe escribir sobre algunha temática e queira que lle axuden a poñer un blogue en marcha.
Decatámonos de que existe moita xente que quere compartir o seu coñecemento, pero que sinte reparos ante a idea de enfrontarse ao deseño ou á conformación da estrutura dun blogue en solitario. Aí é onde entra en xogo A Incubadora que ofrece este servizo de xeito totalmente gratuíto.
Un proxecto aberto á participación
Vencello sae á rede coa intención de seguir medrando a ampliando horizontes. Por iso, convida a todo o que quixer a se unir ao proxecto. Vencello está nas principais redes sociais (Twitter, Facebook) abertos a todas as suxestións, ideas e colaboracións.
Información de contacto para a prensa:
• www.vencello.com
• prensa@vencello.com
• Twitter: @vencello
0 comentários :
Danos a túa opinión