A veces vexo isto...

Redacción.-

Bob Esponja, Bart Simpson, Lola Flores xunto con xente anónima serven ao pintor Héctor Francesch (A Coruña, 1977) para abordar problemas reais da sociedade actual. Unha combinación surrealista que leva ás salas da Galería Moret Art, na Coruña, problemas que ocuparon portadas de periódicos. O traballo titulado A veces vexo isto… (ata o 20 de agosto) está inspirado na novela Sen noticias de Gurb na que Eduardo Mendoza ponse na pel dun extraterrestre para amosar a súa visión da España do momento.

Case tres anos despois da súa última exposición individual na cidade, Francesch mostrará neste espazo un conxunto de obras nas que sobresae unha pintura áxil e fresca onde algunhas das obras de arte máis significativas de mestres como Velázquez ou Picasso conviven en estraña harmonía con outras referencias da cultura popular, como debuxantes de grafitis, Chaplin ou Homer Simpson, entre moitos outros.

Para Nuria Branco, directora de Moret Art "nesta ocasión Francesch sintetiza a súa visión da sociedade actual a través dunha galería de persoas anónimas (con problemas reais) que comparten espazo con celebridades como Lola Flores ou personaxes de ficción como Bob Esponxa".

O propio artista aclara: "nesta mostra que presento en Moret Art Espazo, todas as miñas obras teñen unha historia en común, unha continuidade narrativa. Á parte do compoñente estético, quixen tecer unha reflexión sobre a sociedade na que vivimos".

Nas obras seleccionadas para esta exposición, que se poderá visitar até o 20 de agosto, Francesch sorprende pola súa solidez, pola súa impresionante riqueza de medios técnicos e "por ser capaz de manter a través da súa obra un diálogo fluído co público", en palabras de Nuria Branco. "Héctor aborda de fronte, con altas doses de humor e ironía, temas que durante o último ano foron portada dos xornais".

Héctor Francesch sobresae pola súa firme e coherente traxectoria na que destaca a súa presenza nalgunhas das mellores salas de exposicións nacionais e internacionais, así como a presenza nas feiras de arte contemporánea máis prestixiosas. A obra do artista está presente nas máis destacadas coleccións galegas e estatais, así como nos máis prestixiosos centros de Arte.