Redacción.-
A Asociación Cultural Val de Láncara escolleu ao escritor Agustín Fernández Paz como gañador do XI Premio Ramón Piñeiro Facer País, polo seu "decidido compromiso" con Galicia e coa lingua galega. Así o informaron este venres o secretario da asociación cultural, Carlos López, e Xurxo Rodríguez Lozano, do C.P.I. Ramón Piñeiro da Pobra de San Xiao, nunha rolda de prensa que se celebrou no Consello da Cultura en Santiago.
O xurado deste premio, que elixiu a candidatura de Fernández Paz entre as 45 presentadas, destacou a "innovadora e longa obra narrativa" en lingua galega do escritor, así como os "numerosos premios obtidos" en diversos países. Así mesmo, evidenciou o seu "decidido compromiso con Galicia e coa lingua galega", o que o leva a mostrar actitudes dunha decidido defensa dos valores propios" da Comunidade, "aínda que isto supoña a renuncia a satisfaccións de carácter persoal".
"O desenvolvemento da súa peripecia vital e profesional no ámbito educativo e a sinxeleza do seu carácter, sempre alleo a xestos e actitudes personalistas e de autocompracencia, fano merecedor de ser considerado un dos 'bos e xenerosos' que, co seu labor constante de calado, están "a facer país" e ensinan a "facer país", explica o xurado.
O Premio Ramón Piñeiro Facer País entrégase anualmente a persoas ou entidades que se distinguiron polo seu defensa da cultura e da lingua galega. O primeiro premiado foi o intelectual galeguista Isaac Díaz Pardo, quen foi lembrado este venres polos responsables do premio tras o seu falecemento. Ademais, tamén tiveron palabras para outro premiado recentemente falecido, Avelino Pousa Antelo. Nos seus 11 anos de vida, o premio recoñeceu ademais o labor de persoas como Xosé Manuel Beiras, Luz Pozo Garza, Xosé Neira Vilas ou Luís Tosar, así como de entidades entre as que se atopan o grupo Milladoiro ou o xornal A Nosa Terra.
O galardón, que non conta con dotación económica, entregarase nun acto popular en Láncara que, aínda que aínda non foi fixado definitivamente, terá lugar despois das eleccións autonómicas do 21 de outubro.
0 comentários :
Danos a túa opinión